Archiv för Februar, 2011

Fuuli Bäre

Vor es paar Woche heimer es schöns Sonntigs-Usflögli uf Bärn gmacht. Üse ersti Stopp esch bim nöie Bärgrabe gsi. S’Wätter esch super gsi, d’Sonne het abegschone ond d’Bäre se praktisch aui am pfuse oder omeplegere gsi.

För me eschs de öberhaupt auerersti Bsuech em Bäregrabe gsi ond wäge däm beni fascht chli gschockt gsi wie die arme Bäre früener hei müese “huse”. De nöi Grabe met Blick uf d’Aare, met vöu grüen ond meh Uslauf esch scho chli besser s’alte Domizi. Nor hei die Bäre praktisch gar kei Platz wo se niemer gseht. Vo öberau chame sie beobachte, ond das fendi chli schad.

Witeri Informatione öber Bärepark fendet Dr do: BärenPark

Noch em Parkbsuech seimer nochli idr Altstadt omegloffe ond hei no es paar Fottine gschosse.  Aber lueget säuber:

[googleMap name="Bärenpark" directions_to="false"]Grosser Muristalden 6, 3006 Bern[/googleMap]

geschrebe am 20. Februar 2011. 0 Kommentar

Skiferie in Davos

I dem Johr hemer eusi Skisaison so frühe gstarted wie no nie. Was sech im Nochhinein als glöckliche Zog usegstellt het…me beachtet, set mehrere Woche hets nöme gschneit ide Berge!
Nachdem mer letscht Johr Savognin unsicher gmacht hend, esch das Johr Davos euses Ziel gsi. Met vode Partie d’Astrid ond de Yann.

Gstarted hemer eusi Ferie grad meteme chline Highlight und zwar i de Vaillant Arena vo Davos. HCD vs SCB!!
Nacheme me oder wenigere usglichne erschte Drittel, esch aber de SCB leider vom HCD överrollt worde…de hend au 1,2 Bier Situation nöme chöne ändere. Jänu, mer send jo wäg de Berge do ;)

Eusi Nächt hemer im Club Hotel Davos verbrocht, alles in Allem gehts nüt dra uszetzte, schöni Zimmer und guets Ässe. De Pool hets eus aber ned so ato.

Was Pischte, dLüüt und sWetter abelangt, hemer eus einmol meh glöcklech chöne schätze!! Mer wösse ned voras gläge het (1 Woche vorem WEF oder vor de Schuelferie), aber mer hend Pischte praktisch för eus gha. Keis langs Astoo, no hets  Afänger uf de Pischte gha wo eim hend versuecht abzschüsse. Und au zWätter het me oder weniger metgspelt. Die erschte beide Täg hemer Sonne i volle Zög chöne gnüsse. Über de Mittag hets sogar no för es Nickerchen näb de Parsennhütte glängt. Nachdem mer aber Temperature vo -2° Grad gha hend, was doch sehr sehr war esch, het de sWätter kehrt: Hochnäbel und -15°. Das het eus aber ned vom Fahre abghalte, jedoch esch eim sGsicht fascht abgfore. Am letschte Tag, mer hend gar ned demet grächnet, hemer aber nomol e Prachtstäg chöne gnüsse und hend eusi Ferie met feine Rumpunchs und Jägertee chöne abschlüsse.

Hotel: Club Hotel Davos
Ufem Berg: Uswertig
Usgang: Ex Bar, Chämi Bar, Rotliechtli

[googleMap name="Club Hotel Davos" description="Davos Platz" directions_to="false"]Promenade 23 7270 DAVOS PLATZ[/googleMap]

geschrebe am 20. Februar 2011. 2 Kommentar

Bild Impressione

Das esch dr (Chlätter)-Gepfu!
Fuuli Bäre
Skiferie in Davos
Nöijohrsusflug nach Gruyères

Alli Blog Iiträg

The beginning is the most important part of the work.