Iiträg markiert met ‘Engelberg’

Das esch dr (Chlätter)-Gepfu!

Anstatt fuu ome z’legge ond de ganz Schoggi z’ässe wo mer becho hei, seimer am Ostermändig Morge am Achti rechtig Ängubärg (Engelberg för die wos ned chöi läse ;-) ) abgfahre. 1 1/2 Stond spöter seimer adr Talstation-Station Brunni acho ond se denn ou grad uf d’Luftseilbahn rechtig Station Ristis.
Idr Zwöschestation heimer müese uf ne Sässelilift umstige wo inere enorme Gschwindigkeit (z’Fuess wäre mer schnöuer gsi ;-) ) richtig Hoger gfahre esch.  Dobe acho heimer öis grad rechtig Chlättersteig Brunnistöckli (Schwerigkeitsgrad K2) ufe Wäg gmacht ond noch ca. 10 Minute steilem Ufsteg heimer öises Chlättergstäutli, Höum ond Chlätterhändsche chöne montiere. De Adi esch so nätt gsi ond het öis sini Chlätterusröschtig woner i drüfacher usführig het usglehnt.

För me aus bluetigi Afängerin be aus zwöits a Hoger kraxlet, de Adi als Chlättersteig-Spezi vorus ond de Thomas, ou aus sozäge “advanced” Chlätterer, noch mer.

Scho noch es paar Minute ond es paar Meter witer obe esch (för me) scho s’erste “Problem” uftoucht. Hmm.. wohäre söui metem Fuess ond sowiso wo söui denn mi denn ufezieh met de Hand? Ha mi scho rächt müese zämenä dasi mi ned grad total verchrampfe. Dank Adi’s Rotschläg beni denn ou tatsächlech witercho, ond so hets chöne wieter “opsi” go.

Ha ke Ahnig wie lang das mer gha hei bis zor erste Hängebrugg, aber die hani ohni Problem chöne öberquere, obwohls doch no es paar Meter abe gange esch onter mer. Met schön gradus luege eschs tiptop gange. So nochem Motto “Nie abeluege” ;-) .

Woni mi schochli “igwermt” oder besser gseit “aklimatisiert” ha gha, seimer aber denn scho am Ziel acho. Hoch obe am Gepfu! Ergendwie erliechteret aber ou chli stolz dasis dörezoge ha.

D’Manne hei noni gnue gha ond hei de Chlättersteig Zittergrat (Schwerigkeitsgrad K4) i Agreff gno. E be abe rechtig Härzlisee ond ha si vo unde här fotografiert ond beobachtet. S’het so usgseh aus wörde si sösch praktisch nüt anders mache, so eifach ond liecht wie die beide dä riise Hoger ufe se!

Noch öbbere Stund seimer aui zäme e wohlverdienti Zwöschemahlzit go nä im Resti. Öbrigens chame i dere Station näbst em Chlättere ou no Kneippe oder go Brötle (Holz und Wörscht chame im Resti oder am Brötliplatz chaufe för es Chligäut). Es het e härzige See namens Härzlisee ond natürli hets e schöne Wanderwäg wo bis ganz Abe uf Ängubärg füehrt.

Genau dä Wäg heimer nochem Ässe ou i Agreff gno ond se gmüetlech ca. 1 1/2h lang rechtig Dorf gwanderet ond hei das schöne Bärgpanorama ond das tolle Wätter gnosse. Idr Zwöschestation hets öbrigens no e Rodelbahn ond au nomou Restaurants wome sech cha go stärche.

Aus i Auem heimer e tolle, sonnige ond aktive Ostermändig gha :-)

De Brunni Berg esch au sehr geeignet för Familie, Paraglider (het a däm Tag öbbe 100 devo gha idr Luft), Wanderer, Biker oder au eifach söttigi wo die schöni Bärglandschaft wöi gniesse.

Do no es paar Information öber das Usflogszil.

Ond natürli no es paar Impressione:




[googleMap name="Brunni Engelberg" directions_to="false"]Brunni Engelberg[/googleMap]

geschrebe am 26. April 2011. 2 Kommentar

Bild Impressione

Das esch dr (Chlätter)-Gepfu!
Fuuli Bäre
Skiferie in Davos
Nöijohrsusflug nach Gruyères

Alli Blog Iiträg

The beginning is the most important part of the work.